KHAWHAR LUSUN:
1. Pi Chuauliani Pachuau K-79 Sec - III Chuap tha lo vangin Dt 2.1.2011 khan a boral. Lumenpui a nih hnu ah Rev R.Lalrosanga UPC in Dt 3.1.2011 khan a vuiliam
2. Pu Lawmtluanga K-33 Sec - V Pumna vangin Dt 3.1.2011 khan a boral. Lumen pui a nih hnu in Rev R. Zohmingliana'n Dt 4.1.2011 khan a vuiliam
PASTOR QUARTER PEIH TA:
Electric Pastor Bial Pastor Quarter sak mek chu zawhfel a ni ta a, Dt 4.1.2011 khan Rev H. Lianngaia Gen Secy BCM chuan a hawng. Mizorama Pastor Quarter tha ber pawl ni a sawi hi Upa C. Thanseia M.E. kutchhuang niin Engineer in Charge a ni a, Upa M. Thansiama chu Treasurer niin a hnen atang hian Pastor Quarter saknan cheng Nuai 26 vel sen anih thu kan dawng. A thla lak lo la upload a ni ang
YMA NEWS:
1. Chhiatni Thatni a inkaihhruaina bu chu peih fel tep a ni ta a, Memberte lei theuh tur in kan in ngen ani. Thil thlak danglam a awm nual dawn avangin chik zawk a kan zir pawh a ngai awm e. E.g. Lumen zan hi YMA zan ah chhiar tel tawh tur a ni.
2. YMA Library dinhmun thar berah Lehkhabuawm zat - 610, Member 67, Lehkhabu hawh tawh tu - 335, Lehkhabu hawhchhuah tawh - 829. Member ni duh tan Rs 20/- pe in member a nih theih reng e.
3. Tun Christmas khan kan veng YMA chuan vengchhunga mi harsa leh damlo mi 13 hnenah tanpuina an hlan a, MHIP te pawhin mi 8 hnenah an hlan bawk.
4. Kan Veng YMA pawhin kum 2011 a hruaitu tur kan thlang thar a, chungte chu;-
President - Pu Lalrotluanga
V. President - Pu C. Vanlalmawia
Secretary - Tv H. Zohmingliana
Asst Secretary - Pu LH Lianzama
Treasurer - Pu Lalthlamuana
Fin Secretary - Pu H Vanlalliana
Electric veng YMA ten kan lawm a che. He blog kal tlang hian i ngaihdan te lo share ve la, i veizawgte, puih i ngaihna apiangah puih che kan inhuam reng bawk e
Tuesday, January 4, 2011
Friday, December 31, 2010
Article
Khawvela Billionaire Naupang ber
Mark Zukerberg leh Facebook
-gilbert renthlei
Chhuak hmasa lamah Khawvel nghawr nghing khawp a chanchin ngah Wikileaks chanchin kan chhui tawh a, tun tumah erawh chuan Mizo kristian thalai ten tunlai khawvel thil lar pakhat bengvar nan han chhui leh dawn ila. Khawvelah hian thil tam tak ngaihnawm leh nawm lem lo te a thleng reng a, hmasawnna hrang hrangin min deng reng bawk a, heng thil thleng te hi a tha lam emaw a chhe lam emaw kan hriat a Kristian thalai te kan khaw hawi a zau leh zual theih nan tun tum Thalai huang ah chuan tunlai a lar em em mai khawvel hmun hrang hranga mi te Computer leh internet hmanga mahni dawhkan atanga khawvel lehlam ami te inkawm nana hman lar Facebook leh a siamchhuaktu, khawvela Billionaire naupang ber Mark Zukerberg-a chanchin I han chhui dawn teh ang.
Tunge Mark Zukerberg chu? :- Mark Elliot Zukerberg hi Edward leh Karen te inkarah kum 1984, May 14 khan White Plains, New York ah a lo piang a, unau pianpui pathum neiin chungte chu Randi, Donna leh Ariele te an ni. White Plains ah piang mahse an naupan lai hun tam zawk chu Dobbs Ferry , New York ah an hmang a, amah hi Jewish chhungkua atanga seilian a ni. Zirna lamah a rual pawl tawk tak niin Ardsley High School-a a kallai te chuan Greek leh Latin Philosophy lam a tuipuiin a thiam thei hle a College a kal lai phei chuan Homer-a kutchhuak hla hril ‘The Iliad’ a sawi thiam em avangin a lar thin hle a, chubakah Phillips Exeter Academy-a a insawn hnu phei chuan Maths, Astronomy leh Physics ah te lawman a dawng ziah thin a ni. Mark hian College a kal lain tun thlenga a bialnu ni ta Chinese mi Priscilla Chan nen hian an inchhar a, Priscila Chan hi Doctor zirlai niin amah avang hian Mark hian Chinese ho tawng Mandarin a zir phah nghe nghe a ni.
Mark Zukerberg hian middle school a kallai atang tawhin Computer hi a lo hmelhriat tawh a. A pa hian helam kawng a kal tur hian a fapa hia duhsak hle a, Software siam thin David Newman-a chu Mark-a computer zirtir tur hian kum 1990 chho khan a rawihsak thin a ni. Heng hunlai pawh hian Mark-a hi amah zirtir tu David Newman chuan thiam thei a ti hle a, ‘naupang thiamna bik talent special nei’ a ti hial a ni. A rilru a chak hle a, High School a kal lain an in bul lawk a awm Mercy College ah chuan Graduate Course a zir pah bawk a ni. Computer Programs duan te leh games siam lam te a tui hle thin a, chung zinga pakhat chu a pa hi ha siam (dentist) a ni a, Software pakhat ‘Zucknet’ tih chu aman siam chhuakin a pa dawr leh an in inkar a computer a file hrang hrang in lak pawh nan a hmang a ni. He ‘Zucknet’ hi a kum leh a lo chhuak AOL Instant Mesenger lo chhuahna bulpui niin sawi a ni bawk. High School a kal lai vek hian Mark hian Intelligent Media Group hnuaiah rimawi ngaihthlakna hmanrua pakhat Synapse Media Player a siamchhuak a, he a thil siamchhuah hi IT company lar Microsoft leh AOL ten an lo hriatin Synapse hi lei sak a Mark Zukerberg hi an hnuaia thawh tir tumin an sawm a, mahse Mark Zukerberg chuan he sawmna hi hawlin Havard University-ah zirna sang zawk bei turin kum 2002 September khan a inziak lut ta zawk a ni.
Havard University-a a luh tirh atang hian Mark Zukerberg hi Programming lam a mithiam niin hriat a hlawh sa hle a. Computer Science leh Psychology chu a subject a ni. Havard-a a kum hnih zir kum chuan Computer program thar zirlaite hlawkpui tak tur ‘Coursematch’ chu a duang chhuak a, hemi hnu lawk hian programe dang intihhlimna atan siamin a hmingah ‘Facemash’ tih a vuah a. He Facemash hi a lar em avang leh zirlaiten an zirlai aia an buaipui nasat avangin University thuneitu ten an tih tawp sak ta hial a ni. He thil tihtawp a nih hnu hian university zirlaite chuan Zirlaite thlalak leh an chanchin tawi tarlanna website siam turin University thuneitute an ngen a, hei hi Mark-a’n a lo hriat chuan ‘University hian an siam lo anih pawhin keiman University siam aia tha zawkin ka siam ngei ang’ tiin thu a lo ti tlu a ni.
Enge Facebook ve thung chu le? :- October 28, 2003 it intihhlimna mai mai atana Mark Zukerberg-a’n Facemash a siam University hruaitu ten an tihtawp sak hnu khan Mark Zukerberg chuan hma la leh nghal in kum 2004 khan a thiate pathum Eduardo Saverin, Dustin Moskovitz leh Chris Hughes te nen tang hovin TheFacebook.com chu a duangchhuak leh ta a. A tirah chuan Havard University chhung chauh a hman tura duan a ni. Mahse a hnu zelah Facebook chu lo darh zau zelin Boston a College hrang hrangah te, Staford, Dartmouth, Columbia, New York, Cornell, Brown leh Yale University ah te hman a ni chho a. Hetih lai mek hian Havard University a amah aia senior Cameron Winklevoss, Tyler Winklevoss leh Divya Narendra te chuan Mark Zukerberg chu Havardconnection.com siam an tumna a puiturin an sawm a, mahse Mark chuan chu Website simna tur a an idea ru chhuak a Thefacebook.com siam nana hmangah puhin kum 2004 khan thubuai an thehlut a, chu thubuai chu June 25, 2008 khna remfel niin Facebook chuan $20 million an pe ve ta a ni. A hnuah Mark Zukerberg leh a thiante chu Palo Alto, California ah insawnin Office atan kum 2004 laihawl vel khan in te reuh te an luah ve tan ta a ni. Facebook hi Company hlun leh lar Yahoo, Friendster, Viacom etc ten lei tum in an lo bei tawh thin a mahse an hlawhchham rih zel a. tuna Facebook hlutna hi $ 41 Billion vel ni a chhut niin Mark-a thianpa Napster dinchhuaktu Sean Parker an a hmelhriattir Paypal dintu Peter Thiel chu investor hmasa ber niin 2005 khan Facebook ah hian $500,000 a invest a, heta tang hian $200,000 a domain leiin ‘The’ tih chu paih in an hming atan facebook.com tiin an thlak ta a ni.
Duanchhuah a nih atanga vawiin ni thleng hian khawvel pumah mi maktaduai 500 chuang fe in Facebook hi an hmang mek a. Vawiin ni ah chuan Facebook hi Internet website lun ber leh thlalak awm tamna ber( thlalak Billion 1.4) a ni. Facebook ah hian mimalin mahni pualin hmun(profile) a siam theih a, amaherawhchu profile siam tu tur chu kum 13 a tlin a ngai a, chumi profile hmang chuan thian dang te sawm khawmin thu in thawn nan te leh inkawm nan te a hman theih a ni. Mimal pual a Profile siam ah chuan thlalak te, video te dah luh theih a ni a, mimal tan chauh nilo in pawl ang te pawh in group profile hi siam theih a ni. Hei bakah hian Facebook-ah hian online game chi hrang hrang Mafia Wars, Farmville, Yoville,etc khelh tur tam tak a awm bawk a, hengbakah hian thil tih theih dang (applications) tam tak a la awm bawk a, mahse chungte chu kan sawi vek seng awm love.
Mizoramah pawh heng kan sawi tak internet hmanga thian siamna leh inkawmna (Social Networking Sites) hrang hrang te hi kan hmang nasa in kan hmelhriat tawh hle a. Facebook ah pawh hian Mizo thalai mahni a Profile nei hi 5,000 chuang kan awm tawh awm e. Kan sawi tak Facebook mai bakah hian MIRC, Orkut, Twitter, Hi5, Myspace, Friendster etc leh mobile phones hmang tu te zinga lar em em thin Frenzo te thlengin Mizo thlaite nitin ti ti leh buaipui pakhat a tling mek a. Thenkhatin lehkha zir thei loh phahin tlaivar dawn dawn a thian lo kawm(online) te an awm a, inkawm satliah mai lo a lo ‘CK’ tawk lah bo lo, hmang thiam lo leh chhiatpui fe fe hi chu kan awm a ni. Khawvel hmasawnna rualin ke kan pen ve thei tawh a, internet hmangin khawvel leh liam ami te nen kan inhmu tawnin kan inbe pawh zung zung thei hi hmasawnna pakhat chu a ni ve hrim hrim mai. Amaherawhchu heng hmasawnna te hi kan hmanthiam loh chuan kan nun tichhetu, hun khawhralna satliah leh sum leh rilru senna ho tak a ni thei a ni. Heng kan sawi tak te hi awlsamte a addict theih a ni a, hmansual(abuse) pawh awlsam tak a ni. ‘Purpose Driven Life’ tih ziaktu Pastor lar ber te zinga mi Rev Dr Rick Warren te chuan midang counseling neih pui nan leh harsatna hrang hrang midangte’n an share theih turin Twitter a hmang tangkai a, a hlawhtling hle. Hetiang ang bawk a Facebook rawngbawlna atana hmang tangkai hi Mizo milar te zingah pawh an awm nual mai. Khawvel thiamna sang zelin I dawhkanah hmasawnna hrang hrang a rawn chhawp chhuahsak che in a rawn chhawpchhuak zel dawn. Heng namen lova hmasawnna mi tam takin tangkai taka an hman hi i lo chhiatpui dawn bik em ni?
Tuesday, December 28, 2010
ANGELTE LUAITHLI NUL KHA
MSI@Rose, Electric Veng, Lunglei
Zanin zet zawngthla a eng mawi kher mai. Arsi phe un kara arsi eng bik chu ka thlir a,ka ngaihtuahna hi ahruai kual nasa ngei mai. Ka hma zawn a tlangval rual hlim taka meilum ai chuan min hip hle mai a,chu tlangval rualte chu tute nge an nih a,eng ti turin nge chu mual pawng ah chuan an kal khawm ka hre lo,ka hriat duh ber pawh a ni hek lo,amaherawh chu ka ngaihtuahna khalhding tura an lo awm erawh vannei ka ti hle mai,an chung ah ka lawm tak meuh a,ka thinlung in an meilum chu ka va aipui ve ta thung a
chu zan thla eng mawi no tak hnuai ah chuan keimahin ka thu a,khawvel hi engnge maw a nih a ka lo thlakhlelh ve em em le ti ten ka ngaihtuah a. Tlangval rual hlim nui ri chuan min kai harhin ka pindan lam pan ka tu mek lai chuan ka’n hawi let a,ka chung zawn a arsi lo de vet vet chu ka han hmu ta,chu arsi chuan ka thinlung akhawih kher mai.ka ngaihtuahna te hria in a chunga ka lawm zia hi hria se zawng tun ai khian ka tan a eng ngei ang. mahse fak phu si,fak phut si lo chuan lungawi takin ka chung zawn ah a eng chu ani si a,chu arsi hnuai ah chuan mi tam tak an awm ve tho awm si a,eng ang in nge an ngaih ve ang le,an fakna ri te chu thamral mai tur chuan ka va’n ui tak em!
Krimas boruak leng velin min kaikual nasa bawk a,chung tlangval ho chuan an malsawmna hnar chu kei leh anni chung arsi eng khi a nio tih an ngaihtuah awm si lo a,va hrihhriat ka va chak em! Khi arsi ngei khi alawm kum tam tak liam ta a khawvel tana eng rawn thlen tu chu.
Kha zan thiang mawi tak ah khan khawchhak mifingteleh beramputr chuan chibai an lo buk tawh si a. Khi arsi khi a eng mawi a sin,kha zan ah khan mifingte pawh kha khuanu khan awi lungleng in an hmachhawp thil eng eng emaw an lo dawn ve awm si a,khi arsi khian kha zan khan thil tih theihna mak tak a nei tih hria in an zui chu a niawm si a! khi arsi bawk khian alawm hmun hla tak tak atang te,lam hnai tang te aLal chibai buk tur a ranin hrui thleng chu. mutlum leh nupui fanau te bula awm aia chhinchhiahna mak an zui kha an fakawm ngawt mai,kei ni ila arsi eng mai kha zuiin ka chhuak ve duh angem le? thil nung tinreng te chuan chu chhinchhiahna zui chuan van Lal fapa chu chibai an buk ta anih chu. Ranthleng a tlumpi te,ranin kiang a khau leh thereng te,beram pu te leh an beram hruia te nen,thil nung tinreng te chuan chu zan thla eng no mai tak hnuai a Lal lo piang chibai an buk lai ropui leh maw2izia tur mai chu chhutsen pawh ani lo. an zing ah khan kei lo tel ve chu ni ta ila lawm avangin ka mittui hi ak seng hreh hauh lo ang.
chu zan eng mawi tak ah chuan angelte chu hlimim an au ngei awm si a,eng ang takin nge an lawm ang tih chu mihringtr chhutbak a ni si. Mahse angelte lawm a na au khan chhan tha tak a lo nei reng a sin-Van Lal fapa lei a a lo kal chhan kha an hhre tlat alwm. a nu mari ngei pawhin a hriatfiah fumfe loh kha an hre tlat a sin. A hmabak ti hlawhtling tura khawvel a lo akl khan angelte lung a dum asin,a hmabak pawh an hria a lawm,hrehawm tuar a Ami te a rawn tlanchhuak tur a a rawn piang kha Angelte chuan ropui an ti a,a chanchin an ngaithla kham thei lo asin.chu zan eng mawi tak hnuai a thil nung tin reng ten thawm dim tak leh thinlung inhawng tak a naupiuang chibai an buk lai hmel an hmuh khan an thinlung a ti tui ral takzet a ni. an thilhmuh ropui zia sawichhuak thiam lo khawpin an thinlung chu tuh tui ral sakin awm mahse,ropui tiin,hlim tak leh lawm takin an thlir reng a,an biang ah mittui hruk sen loh tam tak pawh a sur ta ve ang.
chu hun lawmawm kar ah chuan khawngaihna avang a lainatna leh thinlung kehchhia a tuiral,chu naupang tan chuan a in phumru reng si a,van lal fapa nihna atang a thingrem siam tu fapa a hnuhthlak a awm piah lam ah tlawm takin nau neihna hmun pangngai pawh ni lo ran chaw pekna thleng a rawn piang in, ahun lo kal leh zel hmachhawn turin a lo piang chu ani si. Hrehawm tur a thilsiamte leh khawvel hmachhawn tur a inhuamna lo liam a hmangaihna a awm thei chuang lo ni tih angelte khan an hre ve awm reng si a. Kaisara khan chhiarpui lo ruat lo ta se chuan Van Lal fapakha hmun tlawm ber ah a piang kan ti awm tawp si lo a,chumi piah ;lam ah mite ber pianna a piang naute kha miropui arsi chanchin zir pha ngat te’n chibai an buk khan mirethei leh mihausa te tan a piang ni tih a ti lang chiang si.
Kha zan thla eng no riai kar ah khan angelte mittui engzat tak far ang maw? Khang mittui te kha luang ral ami lo in kan chhehvel ah te hian an la zam vel si a,khang mittui zozai karah khan hmangaihna,khawngaihna,lainatna leh ropuina te chu a la inphumru lehnghal. hringnuna bet tlat mittui hi a va han lo hlu em! Nausen dang ang bawkin chu nausen chuan tapin khawvel arawn hmachhawn a,nun hi ennge anih tih hre turin mittui nen hringnun hi a rawn chawk tho si alwm.
Khang mifing te khan zan thla eng hnuai ah an bungrua te tangkaina enturin an inchhawphnawk a,an thinlung in thilmak zawng chungin thla eng chu an en nghei dawn si,chu thla eng no riai kara arsi phe sep sep te chu an chik ve angem le tih te ka ngaihtuah thin. Chutah chuan alwm thilmak beisei chung a arsi an zui lai te,chu thuruk hai lang tur a kawngchhukchho a n kal lai te,an zinkawng a n riltam ali te,an titi a mutchhuakin alo zem riai riai lai te khan vanlalfafa chibai an buk dawn tih an in hre lawk hauh awm si lo a,hre lawk se chuan an inbuatsaih ve deuh tur a nia. chu arsi chu Van Pathianin khawvel enna lo thlen tu tur alo piang tih kkhawvel hrilh tur qatirh a i tih an hre lawk awm hauh si loo aaw!
Chau tak leh hah tak chung a van lal naupianna hmun an han thleng a,thilnung tinreng ten bengchheng lo leh anmahni in dahbo in thinlung inhawng takchung a Naupiang chibai an buk khan alawm angelte thinlung ti tuiral tu chu,chu naupiang chuan hringnun kawng khirhkhan tak a la zawh ve dawn a ni tih te,chung hriatna piahlama ropuina ala chan turte khan alawm angelte thinlung khawih tu chu, lawm avang te,mak tihna leh khawngaihna leh lainatna te khan angelte kha a lo vel tap tawh a sin
Kha naupang kha i tan,ka tan sawng tlangval rualte ta,in thenawmnu tan a lo piang si,hman ah leiah a lo piang a,tun ah kan thinlung ah kan piannawn tir a ngai si. Hman ah kan tan a lo piang a kha hun ah tho khan Angelte khan luaithli an lo nul tawh asin
They came from near they came from far following a distant star to where he lay
Not being sure of what it meant but knowing it was heaven sent they made their way
And the creatures gathered round and didn't make a sound and the angels cried
The angels knew what was to come the reason God had sent his son from up above
It filled their hearts with joy to see and knowing of his destiny came tears of love
And the creatures gathered round and didn't make a sound and the angels cried
I've often thought about that night and wondered if they realized that star so bright
Was sent to tell all the land the son of God would soon become the son of man
And the creatures gathered round and didn't make a sound and the angels cried
And the angels cried and the angels cried
MI HAUSA HNAWK
MIHAUSA HNAWK
Khawvel thang chho zelin Zofate pawh min nghawng ve in kan thang ve zel a. Zofate zingah pawh Mi hausa tak tak an tam ve tawhin Lunglei district bik ah pawh Hausa tak tak an ther ve fur tawhin alang. Chiahpuam han buai vel atangte khan a lang chiang hle.Mi hausa te hi tam tak chu mi thil phal tak tak, khawtlang, mirethei leh pawl thenkhat tan a insawrchhuak nasa, midang tana malsawmna nasa tak ni thin te pawh an awm. Chutih rualin mi kawm leh hnawksak tak tak, midang mitmei venna nei lem lo pawh an ther fuk bawk a.
Ka han sawi duh tak zawk erawh chu an uikawm leh an thilphal lam te, midang tana an in sawrchhuah leh sawrchhuah loh lam te nilo in mihausa, midang tana hnawksak ho hi ani. Ka vei ve em em thin pakhat chu Mihausa ho JCB park na hi ani. JCB kan tih mai hi man to tak, mi nazawng neih phakloh, cheng nuai 30 40 lai man te an ni a, hetiang lei thei chin hi chu an hausa thawkhat tih hi chu tlang hriat ani. Hetiang lei thei tan hi chuan a parkna hmun ngaihtuah hmasak hi thil tihawm tak ni a a lanna lai te pawh a awm. Amaherawhchu chutiang thil chu an ngaihtuah lem lo nge ni JCB tam tak hi Motor kawngsira hun mai, kawng tichep em em a tam hle. Heng hi a hnawk lutuk. Motor kawngpui an ti chep a, Lirthei danga han sut palhin pangti nem a neilo ropui si. A vawtu ekcheh an tih ang mai, a sutu zawk kan sawi he hu mai dawn ani.
Lungleiah pawh JCB tam tak a awm ve ta. JCB hunna tur hi Sawrkar lama thuneitu te pawh hian ngaihtuah puise ka ti ani. District Road, Venglai atanga Sobji Bazar panna kawngpui phei hi kawngpui lun tak a ni a. SP pawhin Motor lian kal phalloh hun siam in, chutiang taka kawng chep leh lun ah chuan Lunglei hmundanga thleng ngailo Traffic Jam pawh a thleng chamchi a, Office kal tur, Hna a kal tur, School kal tur tam tak min ti khawtlai fo reng a ni. Chutih lain MNF Office hlui kawt, NYK Office hnuai Kawng phei chep tak a JCB in hung thin pahnih pathum lai awm reng hian kawng a ti chep em em a sut palh a hlauhawm nen, thuneitu te hian a dahbo dan ngaihtuah rang se ka va ti em. Dt 30.09.2010 zan phei kha chuan Salvation Army building kawt kawng kawi euh lai pelh hret ah hian kawngpui chanve awh meuh in an han hung ruau mai a, midang khalaia veivak ho pawh khan hnawk an ti ve ngawt in ka ring. Heng JCB neitu a piah lawka building lian tak neia khawsa te hian MIPUI ZAHNA CHHETE TAL NEI SELA an JCB hi an in kawt Taxation Office kawt ah tal hian hung thla teh se. Anih loh leh Baje Mual ah te pawh dah mai se. Driver te chuan an pan mai ang chu. Helai hmun a JCB in hung rengte hian kawng an tichep in Mipui an zah lo a. Kawng an tih tawt avangin mipui veivak te buailohna tur an kan buai fo reng ani. He thu hi kan SP zahawm tak te, kan District Thuneitu tan an lo chhiar ve hlauh anih chuan a solve dan min ngaihtuah pui se ka va ti em
Heng lo pawh hi a tam mai. Mi kawngpeng thuam takah kawngdal zawng taka motor dah ching driver mawl fe fe kan la tam. Aizawl lama an dan hman Garrage nei hmasa lo a Motor register theihlohna dan hi khua a tlai hma hian Lunglei ah pawh hian hmang ve ila ka van ti em. Motor 4/5 nei dahna tur nei mumal silo ten a thenawm khawveng an tih buai hi a tam em mai. Tin, henglo pawh hi Motor lian ngah deuh deuh kawngpui sira hung thin an la awm teuh mai. Kawngpui an tichep a, Traffic an ti jam a , mipui tan harsatna tam tak an thlen tih in hria sela chuvangin Sawrkar pawh hian a hun na tur ngaihtuah sak sela kan kawngpui hi a fai kuar mai ang. Kan kawngpui te hi a zim si a.
Subscribe to:
Comments (Atom)